كده باي باي ومن غير زعل

كده أعتقد أني مش غلطان
النهارده يبقي عدي علي البوست بتاع ألس
شهر و 6 أيام وفضلت مستني
وعدي خمس أيام جمعه والنهارده اليوم السادس
يعني لو حد كان حيكتب حاجه كان كتب
مقدرش أضغط علي حد أكتر من كده
الناس مش فاضيه للبلوج
كل واحد عنده همومه
أنا الوحيد الي بدخل أكتب هنا
وأعتقد أنه لسه بدري لحد ماحد ياخد باله ويعرف يفضي نفسه علشان يكتب بوست هنا
وعلشان كده
دي أخر زياره ليه للمريخ
باي باي
ومن غير زعل

الفاتحه للحج سعد الله يرحمه

عدت جمعه وراها جمعه وبعديها جمعه وقبليها جمعه
وبين الجمعه والجمعه جمعه
كل ده ولسه مجاش يوم الجمعه
الله يرحمك ياسعد باشا
الفاتحه علي روحه ياجماعه
الراجل قالها حكمه
مفيش فيده
مفيييييييييييييييش فيييييييييييييييييييييييده
ممممممممممممممممممممممفففففففففففففففففيييييييييييييييييش ففففففففففييييييييييده
وفي الأخر مفيش فيده
والسلام ختام
وبرضه مفيش فيده

لهذا الطفل كل أحترامي

http://www.youtube.com/watch?v=sgs8cZbxvC4&feature=related

حا لي

بحبها وبعشقها ..وعشقها كاويني في الدم بتجري جو شراييني
بين ضلوعي سكنه وعيشه علي أحلامي
من عيني شيفه وبوداني سمعه
من كلامي بتنطق ولساني بتسبق
ملكت علي رووحي
مش عارف أعمل أيه أنزعها أزاي
أطلعها أزاي
أخلعها أزاي
من روحي أتملكت وعليها أتسيدت
أمال لعينه ماسكة فيا وتبت
مش راضيه تسبني وتفلت
ماسكه في رقبتي وفي حضني متكلفته
حالفه ماتفارقني ألا بطلوع رووحي
من الخيال بتنسجلي حياه
في الأيام بتديني أمل
من جوايا بتنادي بتقولي لسه في بكره
لسا الأيام جيه .. لسه عمرك مبتداش
من يوم ماتولدت محسبناش
أنت لسه جي لسه أيامك ماتشافتش
وأحلامك لسه متحققتش
مش راضيه تسبني في حالي
مش عايزه ترحمني باليأس
لس في بكره أقوله مهو زي أمبارح
تقولي عندك النهارده غيره
مش قادر
الدنيا خنقاني وكبسه علي أحلامي
تقولي من الخنقه في فكه
وأحلامك ليها سكه
متنساش أن الدنيه متخلقتش فجأه
متفتكرش أن في حاجه سهله
بس مش قادر فعلا تعبان ومش قادر
مفياش حيل أغامر
مفياش حيل أعافر
سبيني ليأسي ياكولني
بكأبته يغلفني
ويسلب عمري مني
وتخلص الحياه وهي وخده حقها مني
تقولي أنا معاك مش سيباك
أنت حبي مش مفرقاك
من أحلامي روياك
واليأس مش حيخدك حته من الأملاك
أقولها قلبي تعب
تقولي ولو فيها الهلاك
أنا معاك ووراك
ومن أحلامك حنسجلك بكره
ومن ذكرياتك حبنيلك دنيه
والعالم حملكهولك في سنيه
ومن قالبي مخرجتش
ومن بين ضلوعي ماخرجتش
بتغذبني ببكره مش جي
وبتوعدني بحلم مش حي
وأنا وراها ماشي
زي الأعما جراني
ماشيا قدامي وسحباني
ومعرفش علي فين وخداني
وأديني ماشي

أوعى بعدين أزعل

ايوه يا ابنى
كوكب ايه اللى انت رايحه ده ، أنا جايه أهوه. وشرف الكشافة اللى مأخرنى عنك الزفت الوقود الامينى اللى خلص منا فى نص السكة وأخوك عمال يلف على السفن الفضائية اللى حوالينا بخرطوم وبيسرق الوقود من فتحة التنك بتاعتها بجد خلاص قربنا نملاها وجاييييييييييييييييييييييييييييين

أوعى تمشى احسن أزعل وأنا زعلى وحش بجد ، استنانى يوم الجمعة بإذن الله وانا حاكتبلك حبة بوستس من عينة "حبة كآبة يا رب" ماشى

:-)

شكلها حتفضل مخضره علي طول

من الواضح أن كوكب الأرض خرج عن المجموعه الشمسيه أو أني رحت كوكب غلط غير المريخ بتاع المجموعه الشمسيه
أعتقد أني النهارده كملت ثلاث شهور أرضيه ولا حيات لمن تنادي مفيش حد عبرني
مفيش حد جه ولا بعت رساله ولا حتي عبرني بمسدايه علي جهاز الأرسال الكوني
وشكل الوضع حيفضل مستمر علي الشكل ده علشان كده أنا بفكر فعليا أدور علي الحياه في كواكب أخري
والأستعدادت شغاله علي قدم وساق وكلها يومين ونخلع من الكوكب المنيل ده
وحسيب ورايا نصاب تذكاري للأجيال الي جيه من بعدي....ده لو حد جه
وأعتقد أن دي حتكون أخر رساله حبعتها
ونشوفكوا علي خير في نص المجره التاني
سلام

مين الوغد الي قال أن الحياه حلوه

أموت وأعرف مين السفيه الي كان متصور أن الحياه حلوه
تصور معايا يوم من حياتي
أصحي الصبح -مابين العاشره والثانيه ظهرا-وأفطر وروق والذي منه و....الخ
أنزل خمس أدوار علي رجلي علشان عمرتي الغاليه مفيهاش أسنسير
وبرضو أقول الحمد لله بعيد عن دوشة الشارع
أروح الكليه علشان أدخل أحضر المحضرات الي علي وبكون قاعد علي بنش فزيائي
بيحول مقعدتي من الشكل الهندسي النصف دائري الي زاوية مثلث قائم الزاويه
وبرضو أحمد ربنا أني لقيت مكان أجلس فيه بدل مأجلس علي السلم
وساعتها مقعدة الواحد بتكتسب أشكال تكعيبيه نهيك عن الرطوبه والبهدله بتاعيتها
ويعدي اليوم الجامعي علي خير أطلع أتمشي من عند المجمع النظري مرورا بمحمد أحمد
في محطة الرمل علشان نتغدي أنا والتحف صحابي
وصولا الي المنشيه علشان يبتدي صراع الأجيال علشان أعرف أركب وأروح بيتنا
وبعد النصر المتوج بريحة العرق أكون ركبت
أوصل البيت علشان أطلع نفس الخمس أدوار بتوع كل يوم
سلمه أحمد ربنا علي أن أحنا بعيد عن دوشة الشارع
وسلمه أدعي علي صاحب البيت ﻷنه مرضيش يخلي السكان يركبوا أسنسير بعد مالموا الفلوس
أوصل البيت
أكل لقمه و أقعد شويه وعدين أنزل نفس الخمسه الحلوين
أتمشي معي صحابي
مفيش مانع من ساعة بنج بونج
تمشيه من ميامي علي البحر لحد عزه في المندره وكوزين أسكريم و للخلف در
وعدين العوده الي بيتنا السعيد
طبعا متنساش الخمسه الطيبه الي حنطلعهم لحد البيت
لحد هنا الموضوع جميل والحياه حلوه
أصحي تاني يوم وعندي أمل أن العماره تكون نقصت دورين من تحت ولا حاجه
علشان أفتح الباب ﻷكتشف أن في قط مكافح طلع لحد الدور الخامس علشان
يلبي نداء الطبيعه -الثقيل- علي المشايه الي قدام باب بيتنا
وعدين قال أيه الحياه حلوه
أسفوخس

أكيد ولازم

أخصمك أه أسيبك لا...وجوا الروح حتفضل حبيبي الي أنا بهواه
...............................................................................
مافي أعيش ألا معك ......... مافي أكون ألا إلك
..................................................................
قلبي ورحي معك...
................................................
بيكفيني تقللي بحبك هيـــدي الكلمة بتقتلني
......................................................
مشتاقة ليك شوق الهوي لروحي
و حياة عينيك دابت انا روحي
من زمان مشتاقة انا اشوفك
.................................................................
أول مره أدرك أيه الي بيعجبني في نانسي
مش جمالها الصناعي ولا كونها صاروخ أرض جو
السبب هو كلام أغانيها
أكيد أي وحده ممكن تفرم قلب أي واحد بكلام ودلال نانسي
أكيد كل واحد فينا نفسه يلاقي وحده تقول له ولو ربع كلامها بس يكون من قلبها
عن نفسي أنا بتمنا أقابل وحده ربنا يجمعني بيها وتحسسني بالرعشه الكهربيه اللذيذه
الي بحسها لما بفكر في كلام أغانيها

يوم.. مش عارف بس أعتقد أنه مش زي أي يوم

لما الواحد بيكون راكب في مركب ويفضل باصص في أتجاه حركت المركب بيحس أنه مبيتحركش

أنه ثابت لحد مايبص لور علشان يعرف هو بعد قد أيه عن المكان الي كان فيه

نفس أحساسك في لحظات السعاده أو في الأحلام مبتبقاش عارف أنت بتتحرك أزاي أنت في سوانب بتكون واقف قدام الحاجه أو الشخص الي أنت بتبص له ومبتعرفش مين قرب من التاني أنت الي مشيت ولا هوا الي جالك

مفيش فيده

كان عبقري
الله يرحمك ياسعد يابني الراجل من قبل ميحصل أي حاجه كان عارف أن مفيش فيده
طيب
أنا حعلن أول الأنباء الديكتاتوريه
قررت أنا الغازي الموحد لكوكب المريخ بعد أجراء الاستفتاء العام بين السكان المحلين(أنا) قررت أن أعلن فرض الحظر علي الكوكب والأستيلاء عليه ومنع الزوار من دخول الكوكب وشن حرب شعواء علي كل من تسول له نفسه الأقتراب من كوكبي الأحمريك
هذا والله ولي التوفيق
حفظني الله ورعاني
أمضاء مش حستني حد تاني

great men and they white shoes

من 8أيام فاتو رحت أشتريت كوتشي!!!!!!!!!!!!!!!!!!!!ا
بس مش أي كوتشي
لأني لأول مره أشتري حاجه أنا راضي عنها 100 في 100 وكمان أمي ماختلفتش معايا في السعر كالعاده
لونه أبيض ورباطه أبيض كله أبيض في أبيض نفس الحلم القديم الكوتشي الابيض الي جي في العلبه البيضه يخطفني و ...أحم أحم ماعلينا مش موضوعنا
المهم أني أول مره لبسته ونزلت بيه الشارع كانت مع ولدتي
ساعيتها حسيت أحساس أقل حاجه توصفه أنه بديع
أحساس رجعني 17 سنه لورا
نفس أحساسي وأنا نازل أول يوم المدرسه رايح أولي أبتدائي
كنت لابس كوتشي أسود بسوسته من الجنب شبه الكوتشي بتاع محمد أخويا الكبير وكانت أول مره يسيبوني أجيب
حاجه شبه الي هو بيجيبها
كنت حاسس يومها أني بمشي بسرعه وأن نطتي عاليه وأني ممكن أجري أسرع من الأول
بأختصار علشان ذكر القدرات الي منحها لي حيحتاج وقت حسيت أني بقيت سوبرمان
كان أحساس روعه كأني ماشي فوق السحاب
مش عارف ليه الأحساس ده جالي يوم مالبست الكوتشي الأبيض
ساعيتها وشي أحمر من السعاده الطفوليه الي أنا حسيتها وضحكت ولبيت نداء مشاعري
ومشيت بسرعه لحد مأمي نادهت علي علشان هي مش قدره تحصلني
علي فكره أنا فضلت أسبوع أمشي بالكوتشي الأسود بتاعي جوه الشقه بالليل بعد ماكل أهلي يناموا
وبرضو مقدرتش أقاوم نشوة أني أعمل نفس العمله دي أستنيت لما أستفردت بيه بليل
ولبسته وفضلت طول نص ساعه أجري بيه وأنط في الشقه لحد محسيت أني رجعت عندي 5سنين
زي أول مره
كان فعلا شعور مايتوصفش

ومررت بجوار مصنع الرجال

النهارده كنت ماشي جنب مدرستي الثانوي القديمه طوسون الثانويه بنين(مصنع الرجال(أرض الضياع (أوسع مدارس الحياه(حيث يتحد الشئ مع الاشئ))))وكان نفسي من زمان أعدي عليها (من خمس سنين وأنا بفكر في الموضوع ده) أول مأبتديت أقرب منها كانت ذكرياتي عنها بترخ علي دماغي وكنت ماشي بضحك بصوت عالي بسأول ماقربت من الباب حسيت بخوف من أني أدخل المدرسه
ياتري لسه المدرسين بتوعي فكرني؟
ياتري هما لسه موجدين أساسا ؟
وقفت قدام الباب وبطلت أضحك ورجعت تاني لطريقي الأساسي
خفت علي الذكريات الجميله الي عندي تروح لما أدخل ولاقي كل حاجه أتغيرت
خليها ذكريات سعيده بدل ماتكون واقع غريب عني
.........................................ز

كان نفسى أكون معاك من زمان

من مكوك الفضاء "توك@#$%^&*توك " إلى المحطة الفضائية بالمريخ:

بطل تهديد أهبل يا عبيط بكرة الناس تملى المكان عندك وترجع تقول "حبة كآبة يا رب"، احنا جايين اهوه على اقصى سرعتنا بس المخف... احم أقصد الدلعدى سي محمد أخوك لسه بيعانى من آثار جاذبية الأرض وبيرستارت ويب ميل 400 على انفو1239584 وطبعا أنت عارف انى ماقدرش أجى وأبقى معاك لوحدى لأنه عندما يجتمع ياسمين وأحمد فى مكان واحد أكيد حانولع فى بعض "بسبب مخزون الشكالاتة اللى معاك لأنى خلصت اللى معايا خلاص وأحنا لازم يكون معانا حكم" ماشى يا عسل
معلش مضطرة اسيبك دلوقت علشان أروح أشوف الاهب... قصدى سيد الرجالة أخوك قبل ما يخلص على علبة التونة الفاضلة

وسلام

واحوي ياواحوي

أولا أنا مش عارف أن كانت كلمة واحوي بتكتب كده أساسا ولا ﻷ
بس المهم أن أحنا النهارده 27 من شهر 8 وده له معنين
أولا أن يوم واحد في الشهر قرب...........وده معناه أكيد أن حالت (أكلني وأنا مالي طيب سلفني سبني في حالي هتنتهي) بس مش ده موضوعنا
النتيجه التانيه هي الي تهمنا أن رمضان فاضل عليه أقل من أسبوع
وكانت عاده أني أكتب معايده جديده كل سنه و أبعتها لكل أنسان من أحبه أو أحترمه أو رقمه عندي علي الموبايل
وبما أن السنه دي هي أول سنه تعدي علي و أنا بأكتب في حته عامه (حتي لو مكنش في حد
بيقراء الي أنا كاتبه غيري أنا )فقد قررت أني أحط المعايدات دي يمكن تنفع حد
.......................................................................................
في ليله هلالها عالي فوق السحاب
رفعت كفي بالدعاء وأنا بتمناأنه يجاب
طلببت الخير ليك
وطرح البركه فيك
وأسباغ الخير غليك
وسألت ربي يجمعني في الجنه بيك
وبرمضان يهنيك
ورمضان كريم
..................................................................................
يالي رمضان بيك يحلا
ياحلو ومفيش منك أحلا
حلوتك غطت علي حلاوة عسل النحله
طبعا هو في أحلا من لفة قمر الدين
ورمضان كريم
.....................................................................................
لما عنيك تبقي قرصيايه معسله
وودانك مشمشايه مجففه
وخدودك بندقايه مقرمشه
وشفيفك كوباية خشاف متكربسه
تتوقع أقولك أيه غير
رمضان كريم
.....................................................................................
يارب تعجب
وكل سنه و أنا طيب
ملحوظه صغنونه لأختي ألس
أنا بعت الرسايل دي لكل الناس الفودافون الي عندي
يعني تقريبا كل الناس الي أنتي تعرفيهم
ملحوظه أضافيه للي مش فاهم
أنا كسبت 1000 رساله مجانا من فودافون لفودافون حعمل بيهم أيه ...فكر أنت
ورمضان كريم

للللللللللللووووووووووووووووولولولولولولولولوي
مش ممكن في حد وصل عندي هنا
يالهوتاااااااااااااااااااااااي حد جديد جه
ندااااااااااااااااااااااااااااااااااااء الي الزائر الجديد لو مكتبتش خلال 24 ساعه حتكون نهيتك علي أيدي
أنا بحذرك وقد أعذر من زنجر
ومتلومش ألا نفسك لوا تروح مستشفي الكلب تاخد 21 حقنه بعد لما أعض...أحم أحم بعد لما أبوسك
أبوس ايدك أكتب حاجه
طيب شاور قدام الشاشه و أنا حفهم
طيب بلاش اعمل لوج أن و أطلع تاني
وأخير سلامنا للأهل و الأحبه علي كوكب الأرض
أمضاء
قاعد لوحدي من بدري

ههههههههههههههههههههه

أنا مبسوط النهارده قوي ومش عارف أيه السبب مع أني عمالي أخد علي قفايا من الصبح لحد مابقي شبه نقابة فرانين السيده زينب
النهارده عميل من بتوع الشركه الي أنا شغال فيها فسخ العقد بتاعه وأسترد فلوسه وبالتالي العموله بتعتي الي أخدت منها مقدم وصرفته
وبالتالي ديوني زادت
وصاحب الشركه عمال يستحضر لعنات زيوس وكل الألهه علي وعلي العملأ بتوعي الي محدش فيهم نافع
ونتجتي بانت ونجحت بس شايل مدتين منهم أكتر ماده بحبها وحليت فيها وهي التاريخ
وعلي الرغم من كل ده
وعلي الرغم من كل البهدله دي أنا مبسوط بس مش عارف ليه
أحساس عبيط بالأنبساط مالك علي كياني
مش عارف بس أنا حاسس أني يحتجن يأما بودع هي دي الحالات الي أعتقد أن الأنسان ممكن يحس فيها بالي أنا حاسس بيه في الزمن ده علي العموم أنا عندي طاسه في البيت لزوم الحاله الأولي ومنديل كلينكس يلفوني فيها لزوم الحاله التانيه
المهم أنا مبسسسسسسسسسسسسسسسسسسسسسسسسسووووووووط

أنا تعبان

أنا تعبان أو متضايق أو حران أو أي حاجه تخليك مش مبسوط

ثورة التصحيح

من هنا ومن موقعي هذا علي المدعوق الأحمر الي قاعد عليه لوحدي أحب أوضح نقطه صوغنونه
أحنا لما جينا نسمي البلوج ده كنت أنا صاحب فكرة الأسم الي لو ترجمناه حرفيا حيكون ممعناه كلام في المريخ
وعدين أتهموني زورا بالجهل علي أساس أنه المفروض أن أحنا نكتب
talking on mars
في حين أنه كان المقصود من الأسم ده أنه يكون من عينة كلام في المشمش
بس للتجديد والتطوير ومجارت التقدم العلمي خليناها كلام في المريخ
ولأن كل حياتي في المشمش حبيت أطلع ليها حاجه جديده
فخليت كل حاجه في المريخ

أنتوا فين يابشر

المفروض أن البلوج ده جماعي وأن في ناس جين في الرحلات الي بعد كده علشان نستوطن في المريخ بس من الواضح أن الناس دي كانت زهقانه مني وبعتوني لوحدي علي المريخ علشان يخلصوا مني علي الأرض
بس أنا أحب أأكد للناس دي أني مش حسكت
وحفضل أرغي وأرغي وأرغي وأرغي وأرغي وأرغي علي سطح المريخ لحد مامناخ المريخ يتشبع بالرغي بتاعي ويبتدي يهطل علي الكواكب التنيه لحد ماكوكب الأرض يتلط ويتليط بالرغي بتاعي
و أنا من موقعي هذا فوق الكوكب الاحمريكا أدعو كل رغاي علي كوكب الأرض ليلحق بي علي أول طياره ورق مغادره شاطئ الأسكندريه ليستقر به المقام جنبي علي كوكب المريخ
وليحفظني الله
كاتبه
وحيد شريد فوق كوكب بعيد

...........................

كنت النهارده مبسوط بس الحمد لله لسه شغاله

الفزلكه أفضل

ديما كان عندي مشكله مع الأسماء..يمكن لأني متردد أو أني صعب الأرضاء أو زوقي غريب
بس المهم أني ديما بتردد كتير قبل مأختار أسم أي حاجه حتي لو كان أسم أكونت في لعبه أونلين عايز أبص عليها
أختيار الأسم بيتطلب مايزيد علي النص ساعه من التفكير العميق وبعد كده 6ثواني أكتشف أن مش حلعب (بعد مأكون عملت الأكونت) وأطفي اللعبه
ولما أخترت أسم
i can't
عجبني الأسم وقررت أني لو كتبت أي حاجه حتكون تحت الأسم ده وعدين فكرت أعرب الأسم علشان أتجنب اﻷتهام بالفزلكه لأكتشف أنه حيكون مقدرش
وطبعا لأننا في مجتمع عبقري فمحدش حيفسر الأسم ده ألا بصوره تقضي علي كل خططي في الجواز وتكوين أسره و ما إلي ذلك من خطط حتنتفي وتنتهي وتروح في خبر كان لما يكتشفوا
أني (مبقدرش) وعلشان كده أنا أقبل تهمة الفزلكه بصدر رحب ونفس سمحه علشان محدش يتهمني أني مقدرش

أول مكوك الي المريخ

أحنا أول زوار للمريخ ..
تعالوا زرونا
باي باي